ဒိဝါတပတိ အစချီသော ဂါထာတော်သည် အလွန်ငွေဝင်စေသော ဂါထာဖြစ်ကြောင်း၊ စီးပွားဥစ္စာ အလွန်တိုးတက်စေကြောင်း၊ ထီဆုကြီးများ မကြာမကြာ ပေါက်တတ်ကြောင်း၊ ဘေးဥပဒ် အန္တရာယ် အသွယ်သွယ် ကင်းဝေးစေကြောင်း၊ ကောင်းကျိုးချမ်းသာ ပြည့်ဖြိုးကာ ကျက်သရေ မင်္ဂလာအဖြာဖြာ တိုးတက်စေသော ဂါထာဖြစ် …
~~~~~~~~~~~~~~~~~~~~~~~~~~~~~~~~~~~~~~~~~
တစ်နေ့တွင် ကျွန်ုပ်သည် မြို့နီးချုပ်စပ်မှခရိုင် မြို့ကြီးတစ်မြို့ရှိ အထူးကု ဆေးခန်းကြီးတစ်ခုသို့ လူနာမေး သွားရောက်ခဲ့ပါသည်။ လူနာမေးဆိုသော်လည်း အမှန်တကယ်ဆိုရမူ မိတ်ဆွေတစ်ဦး၏ ဇနီး မီးဖွားသောကြောင့် သွားရောက် မေးမြန်းခြင်း ဖြစ်သည်။ ဆေးခန်းတွင် မီးနေသည်နှင့် ကလေးအား သာကြောင်းမာကြောင်းမေးမြန်း၊ အာလာပ သလ္လာပ ပြောဆိုအပြီး အချိန်အတော်ကြာတွင် ဇနီးမောင်နှံ နှစ်ဦး အား နှုတ်ဆက်ကာ ပြန်လာခဲ့ပါသည်။ မိတ်ဆွေဖြစ်သူက ဆေးခန်းမှ လိုက်ပါလာပြီး အနီးအနားရှိ လက်ဖက်ရည်ဆိုင် တစ်ဆိုင်တွင် ကျွန်ုပ်အား လက်ဖက်ရည် လိုက်ဧည့်ခံပါသည်။
လက်ဖက်ရည်သမားတစ်ဦးဖြစ်သော ကျွန်ုပ်သည်ဆိုင်တွင် ထိုင်လိုက်သည်နှင့် ထူးခြားမှုတစ်ခုကို ချက်ချင်း သတိပြုမိ လိုက်ပါသည်။ ထိုအချက်မှာ ဆိုင်တွင်ခုံစေ့သက်စေ့ လူပြည့်နေကာ အုန်းအုန်း ကျွက်ကျွက် စည်ကားနေခြင်းဖြစ်သည်။ လက်ဖက်ရည်ကို မြည်းကြည့်လိုက်သော်လည်း ပုံမှန်လက်ဖက်ရည် အရသာသာဖြစ်၍ ထူးထူးကဲကဲ မကောင်းပါ။ ဆိုင်အပြင်အဆင် အခင်းအကျင်းကို လေ့လာကြည့်လိုက် တော့လည်း ပုံမှန်ရိုးရိုးလေးသာ ဖြစ်၏။ ဘာမှဆွဲဆောင်မှုမရှိ။ သို့သော် လူအပြည့် ရောင်းအား ကောင်းလွန်း လှသည်။ ထို့ကြောင့် စာရေးဆရာ တစ်ဦး၏ ဗီဇအတိုင်း ဟိုကြည့်ဒီကြည့် လိုက်လံအကဲခတ်ကြည့် ရာ ခေါင်းရင်းဘက်မှ ပုံမှန်အနေအထားသာရှိသော ဘုရားဆောင်၏ ဘေးဘက်တွင် စမတစ်ခုကို အလွန်ကြီးမားသော အရွယ်အစား ဗီနိုင်းထုတ်ထားပြီး သစ်သားပေါင်ကွပ်ကာ တခမ်းတနား ချိတ်ဆွဲ ထားသည်ကို ထူးထူးခြားခြား တွေ့ရှိလိုက်ရပါသည်။
ထိုစမကို ကျွန်ုပ်သည် ကောင်းစွာသိပါသည်။ “သဗ္ဗဇယမင်္ဂလာ”ဂါထာအမည်ရသည့် “ဒိဝါတပတိ” အစချီဂါထာကို ရွှေပေါ်ကျွန်း ဆရာတော်ကြီး စမဆွဲ စီရင်ထားခြင်းဖြစ်ပါသည်။ ထိုဒိဝါတပတိ စမ အိတ်ဆောင် အရွယ်များစွာ အထပ်လိုက်ကို ကျွန်ုပ်အား ရွှေပေါ်ကျွန်း ဆရာတော်ကြီး၏ တပည့်ရင်းတစ်ဦးဖြစ်သော ကိုအောင်နိုင်သည် လာရောက် ပေးအပ်ထားကာ ကုန်းသတ္တဝါ အနည်းဆုံး ၃ လ ရှောင်သူများကိုသာ လက်ဆောင်ပေးရန် လာပေးထားခြင်းဖြစ်ပါသည်။ ကျွန်ုပ်သည် ချိတ်ဆွဲထားသော ဗီနိုင်းကားချပ်နှင့် ပတ်သက်၍ စူးစမ်းကြည့်သောသဘောဖြင့် ကောင်တာခုံနားသို့ မယောင်မလည် ထသွားကာ ဆိုင်ရှင်အား စကားစမြည်ဆိုရင်း မေးမြန်းကြည့်ပါသည်။
သူတို့မြို့သူမြို့သား အများစုမှာ တစ်မြို့လုံးလိုလို သာမညဆရာတော်ကြီးကိုသာ ကိုးကွယ်ကြပါကြောင်း၊ ရွှေပေါ်ကျွန်း ဆရာတော်ကြီးကို ကိုးကွယ်သူ မြို့သူမြို့သားမှာ အလွန်နည်းပါးပါကြောင်း၊ ထိုစမကို ကျိုက်လတ်မြို့မှ ရွှေပေါ်ကျွန်း ဆရာတော်ကြီး၏ တပည့်ရင်း အငြိမ်းစားကျောင်းဆရာကြီး တစ်ဦးထံမှ လက်ဆောင်ရရှိထား၍ ပုံကြီးချဲ့ ဗီနိုင်းထုတ်ကာ ယုံယုံကြည်ကြည်ဖြင့် ချိတ်ဆွဲထားပါကြောင်း၊ ယခင်က ချောက်ချီးချောက်ချက်သာ ရောင်းရသော သူ၏ လက်ဖက်ရည်ဆိုင်သည် ထိုစမပုံတော်ကြီးကို ချိတ်ဆွဲပြီးမှ ထူးထူးခြားခြား အံ့သြဖွယ်ရာ ကောင်းလောက်အောင်ပင် တရိပ်ရိပ်ရောင်းအား ကောင်းလာပြီး စီးပွား တိုးတက်လာပါကြောင်း ကျွန်ုပ်အား စိတ်ရှည်လက်ရှည် ရှင်းပြပါသည်။
ကျွန်ုပ်က ဒီစမပုံတော်ကြီး ချိတ်ဆွဲထားရုံနှင့်ပင် ရောင်းအားကောင်းပြီး စီးပွားတက်လာတာလားဟု သေချာဂန သိလို၍ ထပ်မံမေးရာ ဆိုင်ရှင်က “ချိတ်ထားရုံနဲ့တော့ ဘယ်ဟုတ်မလဲကွ ငါ့ညီရ။ အစ်ကိုက အဲဒီဒိဝါတပတိ အစချီဂါထာကို တစ်နေ့ကို ၁၀၈ လုံးပုတီးနဲ့တစ်ပတ်၊ တစ်ပတ်နေ့တိုင်းစိပ်တယ်။ ပြီးတော့မနက်စောစော ဆိုင်ဖွင့် ဖွင့်ချင်း အဲဒီစမပုံကြီးရှေ့မှာ ထိုင်ပြီးတော့ ဂါထာနဲ့ သက်စေ့ ၅၅ ခေါက်ရွတ်ဖတ် သိဒ္ဓိတင်တယ်။ ညဆိုင် သိမ်းပြီးရင်လည်း အဲဒီစမပုံကြီးရှေ့မှာ ထိုင်ပြီး ဂါထာနဲ့ သက်စေ့ ၅၅ ခေါက် ရွတ်ဖတ်သိဒ္ဓိ ထပ်တင်တယ်။ အဲဒါနေ့စဉ် မပျက်မကွက်လုပ်နေကျပဲ။ ခရီးသွားရင်တော့ မလုပ်ဖြစ်ဘူးပေါ့ကွာ။ ပုတီး တစ်ပတ်ကတော့ ဘယ်ရောက်ရောက် စိပ်ဖြစ်အောင် စိပ်ပါတယ်”ဟု ပြန်လည် ရှင်းပြခဲ့ပါသည်။
ဒိဝါတပတိ အစချီသော ဂါထာတော်သည် အလွန်ငွေဝင်စေသော ဂါထာဖြစ်ကြောင်း၊ စီးပွားဥစ္စာ အလွန်တိုးတက်စေကြောင်း၊ ထီဆုကြီးများ မကြာမကြာ ပေါက်တတ်ကြောင်း၊ ဘေးဥပဒ် အန္တရာယ် အသွယ်သွယ် ကင်းဝေးစေကြောင်း၊ ကောင်းကျိုးချမ်းသာ ပြည့်ဖြိုးကာ ကျက်သရေ မင်္ဂလာ အဖြာဖြာ တိုးတက်စေသော ဂါထာဖြစ်ကြောင်း၊ ဘာသာရေးမဂ္ဂဇင်း၊ ဂမ္ဘီရမဂ္ဂဇင်း၊ ဂျာနယ်တို့တွင် မကြာခဏဖော်ပြတတ်၊ တွေ့ရှိနေရတတ်၍ စာဖတ်သူများအနေဖြင့် ထိုဂါထာနှင့် အကျွမ်းတဝင်ဖြစ်နေကာ ဂါထာ၏အစွမ်း ကိုလည်းကောင်းစွာ သိနေကြမည် ဖြစ်သောကြောင့် ကျွန်ုပ်သည် အထူးတလည် မညွှန်းဆိုတော့ပါ။
ထိုဂါထာကို ဓမ္မပဒပါဠိတော် (၂၆)ဗြဟ္မဏဝဂ်၊ ပုဒ်ရေ ၃၈၇ တွင် ဖော်ပြထားပါသည်။ နိုင်ငံတော် ဗုဒ္ဓသာသနာ အဖွဲ့ကထုတ်ဝေသော ဓမ္မပဒပါဠိတော် မြန်မာပြန် စာအုပ်စာမျက်နှာ ၁၅၁ တွင်လည်း ဖော်ပြထားပါသည်။ ထိုဖော်ပြ ချက်တို့တွင် ဆုတောင်းစာဖြစ်သော နမက္ကာရာ နုဘာဝေန၊ သဗ္ဗေပူရေန္တု သင်္ကပ္ပါ ဟူသော အပိုဒ်မပါဝင်ပါ။ ထိုသို့မပါဝင်သော်လည်း ဆုတောင်းစာ ဖြစ်သောကြောင့် မိမိတို့ နှစ်သက်ပါက ရွတ်ဖတ်ပူဇော် ဆုတောင်းနိုင်ပါသည်။ ဆုတောင်းစာ မပါသည်ကိုလည်း ရွတ်ဖတ်ပူဇော်ခြင်းဖြင့်လည်း အကျိုးစီး ပွား ဖြစ်ထွန်းရမည်သာဖြစ်၍ ယုံကြည်သောသဒ္ဓါတရားသည်သာ ပဓာနကျသော အချက်ကြီးဖြစ်ပါသည်။
သံယုတ်္တနိကာယ် နိဒါနဝဂ္ဂ ဘိက္ခုသံယုတ် အဋ္ဌကထာတွင် သီဟိုဠ်ကျွန်း ဘာတိကမင်းလက်ထက်၌ ဘာတိကမင်း တောင်းပန်သဖြင့် ပညာရှိ အမတ်တစ်ယောက်သည် ထို “သဗ္ဗဇယမင်္ဂလာ” ဂါထာတော်ကို ရွတ်ဖတ်သရဇ္ဈာယ်ရာတွင် ရွတ်ဖတ်ဆဲခဏ၌ အသပြာတစ်ထောင် (၁၀၀၀) လက်တွင်းသို့ ရောက်လာခဲ့၊ ချီးမြှင့်ခံခဲ့ရသဖြင့် ငွေချက်ချင်း လက်ငင်းဝင်လာစေသော ဓာတ်သက်ရှိသောကြောင့် “ငွေဝင်ဂါထာ”ဟု ဆရာစဉ်ဆက် သတ်မှတ်ကာ လူသိများနေကြခြင်းဖြစ်ပါသည်။
ထိုအစွမ်းထက် လွန်းသောဂါထာတော်ကို ရွှေပေါ်ကျွန်း ဆရာတော်ကြီးက စမအဖြစ် စီရင်ကာ ဝေနေယျ ပရိသတ်များ အကျိုးများစေရန်၊ အဆောင်အရွက် ပြုနိုင်ရန် စီရင်ပေးထားခြင်းဖြစ်ပါသည်။ ထိုစမတွင် သံ၊ ဂုံ၊ ပ၊ မ၊ ယျ၊ ဘုရား ငါးဆူ။ ပု၊ ဒိ၊ အာ ဉာဏ်တော်သုံးပါး။ အရဟံ ဂုဏ်တော် မ လေး မ။ က,ပ,၀,ဓ၊ စ,ဓ,ဗ,၀ စမအက္ခရာများ၊ နဝင်းညွန့်များ၊ အဋ္ဌလဂ်အရပ် ထောင့်ရှစ်ထောင့်တို့ဖြင့် အပွင့်ပုံသဏ္ဌာန် ဖော်ကာ စီရင်ထားခြင်း ဖြစ်သောကြောင့် ဘက်စုံ၊ စွယ်စုံ အကျိုးပြု ပွင့်လန်းစေသော စမတော်ကြီး ဖြစ်ပါသည်။ ထို့ကြောင့် စာဖတ်သူတို့ အကျိုးထူးစေရန် ရွှေပေါ်ကျွန်းဆရာတော်ကြီး စီရင်ထားသော စမပုံတော်ကို ဖော်ပြပေး လိုက်ရပါသည်။
သဗ္ဗဇယ မင်္ဂလာဂါထာတော်
● ပါဌ်၊ အနက်
(၁) ဒိဝါ တပတိ အာဒိစ္စော၊
ရတ္တိ မာဘာတိ စန္ဒိမာ။
သန္နဒ္ဓေါ ခတ္တိယော တပတိ၊
စျာယီ တပတိ ဗြာဟ်္မဏော။ ။
(၂) အထ သဗၺ မေဟာ ရတၱႎ၊
ဗုဒ္ဓေါ တပတိ တေဇသာ။
တာဒိသံ တေဇ သမ္ပန္နံ၊
ဗုဒၶံ ၀ႏၵာမိ အာဒရံ။ ။
အာဒိစ္စော – ရောင်ခြည်တစ်ထောင် အလင်းဆောင်သော၊ ထွန်းပြောင်ရှိန်ဝင်း၊ ရှင်နေမင်းသည်၊ ဒိဝါ – နေ့အခါ၌၊ တပတိ – မိုက် မှောင်ပယ်ဖျောက်၊ ထွန်းလင်းတောက်ပ၏။ စန္ဒိမာ – သော်တာယုန်နန်း၊ လပြည့်စန်းသည်၊ ရတ္တိံ – ညဉ့်အခါ၌၊ ဘာတိ – ထွန်းလင်းကျက်သရေ၊ တောက်ပလေ၏။ ခတ္တိယော – ရေမြေပိုင်နင်း၊ ပြည့်ရှင်မင်းသည်၊ သန္နဒ္ဓေါ – ချပ်ဝတ်တန်ဆာ ဆင်ယင်သောအခါ၌၊ ဘာတိ – မင်းတို့ ကျက်သရေ ထွန်းလင်း တင့်တယ်တောက် ပလေ၏။ ဗြာဟ္မဏော – မကောင်းမှုကို၊ အပပြုပြီးသော၊ ရဟန္တာ ပုဂ္ဂိုလ်သည်၊ စျာယီ – စျာန်ဝင်စားသည်ရှိသော် (ဝါ) စျာန်ဝင်စားသောအခါ၌၊ တပတိ – ရဟန်းကျက်သရေ ထွန်းလင်း တင့်တယ် တောက်ပလေ၏။ အထ- ထိုမှ တစ်ပါး (ဝါ) ထိုနေမင်း၊ လမင်းအစရှိသည် တို့ထက်၊ ဗုဒ္ဓေါ – သစ္စာလေးရပ် တရားမြတ်ကို ဆတ်ဆတ်သိမြင် ဘုရားရှင် ကိုယ်တော်မြတ်ကြီးသည်၊ သဗ္ဗံ – အလုံးစုံသော၊ မဟောရတ္တိံ -နေ့၊ ညဥ့်တို့ပတ်လုံး၊ တေဇသာ – ပါရမီတော်ကြောင့် ဖြစ်သော တန်ခိုးတော်ဖြင့်၊ တပတိ – ဗုဒ္ဓကျက်သရေ ထွန်းလင်း တင့်တယ် တောက်ပ တော်မူ လေသတည်း။
တာဒိသံ – ထိုသို့ သဘောရှိတော်မူသော၊ တေဇသမ္ပန္နံ – နေ့၊ ညဉ့်မညှိုး၊ တောက်ပဖြိုးသည့် တန်ခိုးတော် နှင့်လည်း ပြည့်စုံတော်မူထသော၊ ဗုဒ္ဓံ – မြတ်စွာဘုရားကို၊ အဟံ-တပည့်တော်သည်၊ အာဒရံ – ကျိုးနွံမသွေ ရိုသေလှ စွာ၊ ၀န္ဒာမိ – သဒ္ဓါဖြိုးဖြိုး၊ လက်အုပ်မိုး၍ ရှိခိုးပါ၏ အရှင်မြတ်ဘုရား။ ။
ကောင်းမှုအကြောင်းပြုတောင်းဆုပြည့်ပါစေ။
(စမပုံတော်ကို မိတ္ထူကူးယူပြီး အိတ်ဆောင် အရွယ်အဆောင်အရွက်ပြုလျှင် ထိုပုံတော်ကို နှုတ်ခမ်းဝတွင်တေ့၍ ဂါထာကို မိမိ၏သက်စေ့ အခေါက်ရေ နေ့စဉ်ရွတ်ဖတ်ကာ သိဒ္ဓိတင်ပေးရပါ မည်)
– သုခစုစံ(ကျိုက်လတ်)