တနင်္ဂနွေသားသမီးတွေဟာ ပထမဂြိုဟ်အိပ်ဟာ ၆နှစ်တာကြာမြင့်သော တနင်္ဂနွေဂြိုဟ်မှာပဲ ပြန်လည်ဂြိုဟ်စား တာဖြစ်ပါတယ်။ ဒါကြောင့် ပဲမွေးစကနေ ၆နှစ်အတွင်းမှာ တနင်္ဂနွေသားသမီးတွေဟာ အခြားနေ့ဖွားတွေနဲ့ မတူတဲ့ကံက ငွေကံဖြစ်ပါတယ်။ ငွေကံကောင်းတဲ့ဖွားဇာတာတွေဖြစ်ခဲ့ရင် ပိုမိုသိသိသာသာ မိမိကံကြောင့် မိဘတွေဆီမှာငွေဝင်တာ မျိုးတွေကြုံရတတ်ပါတယ်။
တနင်္ဂနွေဘင်္ဂဖွားတွေဟာ မွေးစကနေ ၆နှစ်အတွင်း နေရာထိုင်ခင်းတည်ငြိမ်မှုနည်းပါးတတ်ပါတယ်။ မိမိတို့ နေအိမ်ပြောင်းလဲရတာ၊မိဘတာဝန်ကျရာလိုက်ပြောင်းနေရတာ၊မိဘချင်းမသင့်မြတ်သူဆိုရင်တော့ အမေအိမ်၊ အဖေ့ အိမ် တလှည့်စီပြောင်းလဲနေထိုင်ရတာမျိုးတွေ ကြုံတွေ့ရတတ်သလို…ဆီးဝမ်းသွေးလေ မမှန်ခြင်းကိုလဲ မွေးစက နေ ၆နှစ်အတွင်း ခံစားရတတ်ပါတယ်။ ဝမ်းအလွန်ချုပ်တာ၊ဝမ်းပျက်ဝမ်းလျော ဖြစ်လွယ်တာမျိုးတွေဂရုစိုက်သင့်ပါတယ် ။ငယ်ရွယ်စဉ်ကာလတွေမှာ ညနေ နွားရိုင်းသွင်းချိန်မျိုးမှာ တောင်အရပ်ကို ချီးပိုးပြီး ထိန်းကျောင်းတာမျိုးတွေကအစ ရှောင်သင့်ပါတယ်။ မွေးစကနေ ၆နှစ်အတွင်း ခွေးကိုက်ခံရတာမျိုးတွေ၊ထိမိခိုက်မိတာမျိုးတွေ ကြုံလွယ်ပါတယ်။ ဒီ အသက်အပိုင်းအခြားအတွင်း ကျန်းမာရေးညံ့နေပြီဆိုရင် ခရီးအသွားအလာများတဲ့ တနင်္ဂနွေသားသမီးတစ်ယောက် ယောက်ကို ငွေလှူပါ။ တနင်္ဂနွေ ဘင်္ဂဖွားတွေကို လုံးဝမမှည့်သင့်တဲ့နာမည်တွေက တနင်္ဂနွေအစ တနင်္ဂနွေအပိတ်နာမည် ရယ်၊တနင်္ဂနွေအစ ဗုဒ္ဓဟူးအပိတ်နာမည်တွေရယ်ကို အထူးရှောင်ပါ။
တနင်္ဂတွေ မရဏဖွားတွေကတော့ မွေးစကနေ ၆နှစ်အတွင်း ရေနဲ့မတည့်ပါဘူး။ ရေကိုစိမ်ချိုးတာမျိုးတွေ၊ရေ လမ်းခရီး မကြာခဏသွားတာမျိုးတွေကို ရှောင်သင့်ပါတယ်။ မွေးချိန်ကသာ ညနေပိုင်း ညပိုင်းမွေးခဲ့မယ်ဆိုရင် မိမိတို့ ကံအကူအညီနဲ့ မိဘတွေမှာ အိုးအိမ်ဝယ်နိုင်ခြင်း၊ အမွေအဖြစ်အိမ်ခြံရခြင်းများတွေ ကြုံလာဖို့ အထောက်အပံ့ဖြစ်စေ ပါတယ်။ မိဘဇာတာ သိပ်ပြီးကံခေနေသူတွေဆိုရင်တော့ မရနိုင်ဘူးပေါ့။ ကံကောင်းတဲ့အချက်က မိမိတို့ငယ်ရွယ်စဉ် ကာလတွေမှာ မိဘတွေရဲ့ တိုက်ရိုက်စောင့်ရှောက်ခြင်း မခံရရင်တောင်မှ(မိဘအဝေးရောက်နေသူ၊မိဘဆုံးပါးသွားသူ) မိမိကို မိဘသဖွယ် စောင့်ရှောက်ပေးမဲ့ တစ်စိမ်းတရံတွေ ကြုံလာတတ်တဲ့သူတွေပါပဲ။ လမ်းခရီးအန္တရာယ်ရှိတာမျိုးမို့ ယာဉ်ကားအသွားအလာများ တဲ့ လမ်းဘေးတွေမှာ နေသူတွေဆို ကလေးလမ်းလျှောက်တတ်ချိန် မိဘတွေအလစ် အငိုက် လမ်းပေါ်ပြေးထွက်တာမျိုးတွေ သတိထားပေးရပါလိမ့်မယ်။ တနင်္ဂနွေမရဏဖွားလေးတွေ ငယ်ရွယ်စဉ်ကျန်းမာ ရေးညံလာပြီဆိုရင်တော့ ငါးကြီးဆီကို အဘွား၊ကြီးတော်၊အဒေါ် ၊အမေ၊အမတွေကို ကလေးနဲ့ထိကိုင်ပြီးလှူဒါန်းပေးနိုင် ပါတယ်။ တနင်္ဂနွေမရဏဖွားတွေကို နာမည်ပေးရာမှာတော့ တနင်္ဂနွေအစ တနင်္လာ အပိတ်နာမည်ရယ်၊တနင်္ဂနွေအစ ကြာသပတေးအပိတ်နာမည်မျိုးတွေရယ်ကို မမှည့်တာအကောင်းဆုံးပါပဲ။
တနင်္ဂနွေအထွန်းဖွားတွေကတော့ မွေးစကနေ ၆နှစ်အတွင်း သိသာထင်ရှားတဲ့ ကံကောင်းမှုလေးတွေ ကြုံရ တတ်ပါတယ်။ မိသားစုထဲမှာ ကောင်းမွန်တဲ့ ဖခင်ကို ပိုင်ဆိုင်ထားတယ်ဆိုရင်တော့ ထိုဖခင်ဆီက မေတ္တာတွေကိုအထူး ရရှိတတ်သလို၊ မိမိကံအရှိန်နဲ့ ဖခင်ကလဲ ကောင်းတဲ့ဒသာဖြစ်သန်းချိန်သာဖြစ်မယ်ဆိုရင် ဖခင်စီးပွားအလွန်တိုးတတ် သွားနိုင်တာကို အထင်အရှားတွေ့ရပါလိမ့်မယ်။ နေရာထိုင်ခင်းကံအားကောငါ်းတဲ့သူတွေဖြစ်တာမို့ ငယ်ရွယ်စဉ်မှာ နေရာကောင်းနေရခြင်းမျိုး၊ ကောင်းသောပတ်ဝန်းကျင်ရှိတာမျိုးတွေကြုံရတတ်ပါတယ်။ သတိထားရမှာက ကိုယ့်ကို မွေးပြီး အသက်၆နှစ်အတွင်း မိဘတွေအနေနဲ့ အလိမ်ခံရတာမျိုးတွေ၊ နီးစပ်သူတွေအကောက်ကြံခံရတာမျိုးတွေ ဖြစ် တတ်ပါတယ်။ မွေးစကနေ ၆နှစ်အတွင်း တနင်္ဂနွေဂြိုဟ်အိပ်ချိန်မှာ စက်ပစ္စည်းနဲ့ပတ်သက်ပြီးထိခိုက်မိတာမျိုးတွေဖြစ် တတ်သလို ကိုယ့်ထက်ငယ်သော ကလေးတွေ၊ညီညီမတွေနဲ့ ဆော့ရင်းကနေထိခိုက်မိတာမျိုးတွေဖြစ်တတ်ပါတယ်။ တနင်္ဂနွေအထွန်းဖွားလေးတွေဟာ ကျန်းမာရေးညံ့လာပြီဆိုရင် အနီရင့်ရောင်တွေရှောင်ပြီးဝတ်ဆင်ပါ။ ငါးလွှတ်ပေးတာ မျိုးတွေများများဆောင်ရွက်ပါ။ တနင်္ဂနွေအထွန်းဖွားလေးတွေကို နာမည်မှည့်တဲ့အခါမှာတော့ တနင်္ဂနွေအစ အင်္ဂါ အပိတ်နာမည်မျိုးတွေ၊ ကြာသပတေးအစ သောကြာအလယ် တနင်္လာအပိတ်နာမည်မျိုးတွေ လုံးဝမမှည့်သင့်ပါဘူးဗျ။
တနင်္ဂနွေ သိုက်ဖွားတွေကတော့ မွေးစကနေ အသက်၆နှစ်အတွင်း ကြာသပတေးဂြိုဟ်ရဲ့အထောက်အပံ့လေးကြောင့် ငယ်ရွယ်စဉ်မှာထူးထူးခြားခြား ကံမညံ့ပါဘူး။ မိဘကံတွေအထူးညံ့နေမှသာ အဆိုးဘက်ကိုရောက်ပါလိမ့်မယ်။ အချို့ဆို မိဘတွေကအလုပ်မလုပ်ကြ ရင်တောင်မှာ ထောက်ပံ့မဲ့ ဖေကြီးမေကြီး ဦးကြီးဘကြီး တွေကြောင့် စားဝတ်နေရေး၊ ပညာရေး ကြောင့်ကြမစိုက်ရတာ မျိုးကြုံရတတ်ပါတယ်။ ငယ်ရွယ်စဉ်မှာ သူတို့ရဲ့ကံကြောင့် မိဘတွေလဲ အထိုက် အလျောက်အဆင်ပြေနိုင်ကြတာကို တော့တွေ့ရတယ်။ သတိထားရမှာက ဗုဒ္ဓဟူးဂြိုဟ်နဲ့မတည့်တာမို့ ငယ်ရွယ်စဉ်တွေ မှာတော့ ဆီးဝမ်းသွေးလေ မမှန်တာ မျိုးတွေ၊ ဗိုက်အောင့်တာ၊သန်ထိုးတာ၊ တုပ်ကောင်းထိုးတာမျိုးတွေဖြစ်ရ တတ် ပါတယ်။ အစားမှားတာနဲ့ ဗိုက်နာတတ်တဲ့ သူလဲဖြစ်ပါတယ်။ငွေကြေးအထောက်အပံ့အားကောင်းနေပြီးတော့ ကိုယ့် အတွက် ရည်မှန်းပြီးမိဘတွေက ငွေရှာမယ် ဆိုရင် ပိုအဆင်ပြေကြပါတယ်။ ပညာရေးအပေါ်စိတ်ဝင်စားကြသူတွေ(သို့) ဥာဏ်ထက်မြက်ကြသူတွေဖြစ်ပါတယ်။ နာ မည်ကို သောကြာနဲ့ပိတ်ပြီးမှည့်မိရင်တော့ ပညာထက် အပျော်အပါး အလေ လိုက်မှုတွေကို ဦးစားပေးသွားတတ်ပါတယ် ။ နာမည်ကို စနေနဲ့ ပိတ်ပြီး မှည့်မိရင်တော့ ဘဝမှာရန်သူပေါများခြင်းတွေ၊ ရန်သူတွေရဲ့ ဒုက္ခပေးတာခံရတာမျိုးတွေကို ဘဝတစ်လျှောက်လုံး အထူးကြုံရတတ်ပါတယ်။ အပူအားကြီးတဲ့ဇာတာမို့ ငယ်ရွယ်စဉ်တွေမှာ အပူကြောင့်ဖြစ်တဲ့ရောဂါ တွေကို အထူးဂရုစိုက်ပေးပါလို့မှာချင်ပါတယ်။
တနင်္ဂနွေရာဇဖွားတွေကတော့မွေးစကနေအသက်၆နှစ်အတွင်းမိဘကံတွေနဲ့တိုက်ရိုက်ဆက်စပ်နေသူတွေလို့ ပြောရ လိမ့်မယ်။ နေလနှစ်ပါး ထွန်းလင်းကြတာမျိုး ဒီလိုဇာတာမျိုးက ချမ်းသာတဲ့မိဘ၊အသိုင်းအဝိုင်းကြီးတဲ့မိဘ၊ ပညာရှိတဲ့မိဘ တွေ ဝမ်းထဲဝင်စားရင် အလွန်ကောင်းစားကြပါတယ်။ မိမိတို့ကံကိုယ်က ငယ်စဉ်ကတည်းက မထင်ထား လောက်အောင် ကု သိုလ်ထူးကြသူတွေဖြစ်ကြပါတယ်။ ငယ်ငယ်ကတည်းက ကိုယ့်ကိုအကြောင်းပြုပြီး အလှူကြီးပေးနိုင် ကြတာမျိုးလဲ အများ အပြားတွေ့ရပါတယ်။ မိဘတွေက မဟာဘုတ် ၃ကြွင်းဖွားတွေ၊ ၂ကြွင်းဖွားတွေဖြစ်မယ်ဆိုရင်တော့ ဒီဇာတာရှင် ကလေးငယ်တွေနဲ့ ကံအကျိုးပေးဆက်စပ်နေနိုင်တာကိုလဲ အထင်အရှားတွေ့ရပါတယ်။ ပညာမတတ်တာ မျိုးသိပ်မတွေ့ ရဘဲ ပညာရှိသူတွေ၊ ပညာတတ်သူတွေ အများအပြားတွေ့ရပါတယ်။ ဒါကြောင့်ပဲ ဆင်းရဲမိဘတွေမှာ ဝင် စားရင်တော့ ငယ်ရွယ်စဉ်မှာ ရွှံတွေဖုံးနေတဲ့ ပတ္တမြားလို မထင်မရှားဖြစ်တတ်ပြီး အသက်၃၀ကစလို့ ကိုယ်ဒူးကိုယ် ချွန်အောင်မြင်မှု တွေကိုပြန်လည်ရရှိတတ်ပါတယ်။ မိဘတွေသာ ချမ်းသာမယ်ဆိုရင်တော့ မိဘတွေရဲ့အမွေအနှစ်ကို အနှောင့်အယှက် မရှိဘဲ အပြည့်အဝရရှိတတ်ပါတယ်။ ငယ်စဉ်မှာ ကျောင်းမကြာခဏပြောင်းရတာ၊မူကြိုကျောင်းတွေ အပြောင်းအလဲများ တာ ဆရာမတွေနဲ့အဆင်မပြေတာမျိုးတွေဖြစ်တတ်ပါတယ်။နာမည်ကို တနင်္ဂနွေအစ ကြာသပတေး အပိတ်သာမှည့်မိရင် လူမုန်းများခြင်း၊ထင်သလောက်အဆင်မပြေခြင်းတွေဖြစ်တတ်သလို၊နာမည်ကို တနင်္ဂနွေအစ သောကြာအပိတ်မှည့်မိရင်လဲ အိမ်ထောင်ရေးကိုအလွန်ထိခိုက်သွားစေနိုင်ပါတယ်။
တနင်္ဂနွေပုတိဖွားတွေကတော့ ငယ်ရွယ်စဉ်မှာကတည်းက လူချစ်လူခင််များကြတာကိုတွေ့ရပါတယ်။ မိခင်၊ အဖွား၊ ကြီး တော်တွေရဲ့ ဖူးဖူးမှုတ်ချစ်ခင်မှုတွေကို အထူးရရှိကြသူတွေလဲ ဖြစ်ပါတယ်။ ငယ်ရွယ်စဉ်မှာမတော်တဆ ထိခိုက်မိတာမျိုး တွေ၊ချော်လဲတာတွေ အမြင့်ကျပြုတ်ကျတာမျိုးတွေကို သတိထားပေးရမဲ့ကလေးတွေလဲဖြစ်ပါတယ်။ ငယ်ရွယ်စဉ်ကာလတွေမှာ ရွှေကိုအမြဲတစေဝတ်ပေးတာမျိုးကို မလုပ်စေချင်ပါဘူး။ မွေးချိန်အရသာ တနင်္ဂနွေဂြိုဟ်အား နည်းနေမယ်ဆိုရင်တော့ ရွှေတွေဝတ်ထားရင် ကျန်းမာရေးကိုထိခိုက်စေနိုင်ပါတယ်။ ပညာတတ်အသိုင်းအဝိုင်းနဲ့ နီးစပ် တဲ့ဇာတာမျိုးတွေဖြစ်ပြီး မိသားစုတွေ၊ဆွေမျိုးတွေထဲမှာ ပညာရေးနဲ့ပတ်သက်ပြီးကျွမ်းကျင်သူတွေရှိနေတတ်ပါတယ်။ ထိုသူတွေရဲ့ အကြံကိုလိုက်နာပြီးငယ်ငယ်ကတည်းကသာ ကျောင်းကောင်းကောင်းကို ရွေးတတ်နိုင်မယ်ဆို ပညာရေး လမ်းကြောင်းဖြောင့်တန်းပါလိမ့်မယ်။ သတိထားရမှာက အပျော်ကြူးတဲ့ဘက်ကို ရောက်သွားပြီး မိဘကသာ အလိုလိုက် လွန်းရင်းတော့ ရိုင်းစိုင်းတဲ့အဆင့်ကိုရောက်သွားတတ်ပါတယ်။ ဒီလိုကလေးမျိုးဟာ ငယ်ငယ်ကတည်းက မိဘကသွန် သင်မှုမကောင်းရင် ဂုဏ်မောက်တဲ့ဘဝရောက်သွားတာမျိုး၊ရွှေရှိမှ၊ငွေရှိမှ လူရာဝင်တယ်ထင်သွားတာမျိုး စတဲ့မကောင်း တဲ့စိတ်တွေကို ဖြစ်စေနိုင်တာကိုသတိထားရပါလိမ့်မယ်။နာမည်မှည့်တဲ့အခါ တနင်္ဂနွေအစ အင်္ဂါအပိတ်နာမည်ကို လုံး ဝမှည့်လို့မရပါဘူး။ နာမည်မှည့်တဲ့အခါ တနင်္ဂနွေအစ သောကြာအပိတ်နာမည်တွေကိုမှည့်ထားမိရင် ကျန်းမာရေးအထူး ညံ့စေနိုင်ပါတယ်။
တနင်္ဂနွေအဓိပတိဖွားလေးတွေက မူလဇာတာအင်အားကောင်းကြသူတွေဖြစ်ကြပါတယ်။ငွေကြေးနဲ့ပတ်သက် သောကံတွေအထူးကောင်းကြတယ်။ ငယ်ရွယ်စဉ် မွေးစကနေ ၆နှစ်အတွင်း အင်္ဂါနဲ့တနင်္ဂနွေဂြိုဟ် ပူးတွဲစိုးမိုးနေတာက ကလေးကို အတ္တကြီးသွားစေတဲ့ အဓိပ္ပာယ်ပါပဲ။ သီးသန့်နေလိုစိတ်မြင့်မားတယ်။ ရွယ်တူသူငယ်ချင်းတွေက သူပစ္စည်း ကို ခဏယူဆော့ရင်မကြိုက်ဘူး။ နာမည်ကိုသာ အင်္ဂါဂြိုဟ်ဆိုးစေအောင် မှည့်ထားမိရင်ပိုမို သတိထားရပါလိမ့်မယ်။ မောင်နှမထဲမှာလဲ ဗိုလ်ကျအနိုင်ယူတာမျိုးဖြစ်သွားတတ်ပါတယ်။ အသက်ကြီးလာလဲ အခြားသူတွေအပေါ်အထင်ကြီး မှုအားနည်းပြီး ငါသိငါတတ်ဖြစ်သွားနိုင်တာမို့ ငယ်ငယ်ကတည်းက မေတ္တာတရားတွေ၊ကိုယ်ချင်းစာ တရားတွေနဲ့ ထုံမွှန် ပြီး ထားဖို့လိုအပ်တတ်ပါတယ်။ အဲလိုမှမလုပ်ပေးရင် ငါအဆင်ပြေဖို့ဆိုတဲ့ အတ္တကိုသာ ဦးစားပေးဆောင်ရွက်သွားတတ် ပါတယ်။ ကံကောင်းတာက ဒီကလေးတွေက ငယ်ငယ်ကတည်းက နိုင်ငံခြားဘာသာစကားတွေကို တွဲသင်သွားဖို့ အကြံ ပေးချင်ပါတယ်။ သင်ရတာက နားလည်မှုလွယ်ပြီးတော့ အရာရာသိလွယ်မြင်လွယ်တဲ့ ကလေးမျိုးတွေလဲဖြစ်ကြတာ အများအပြားတွေ့ရပါတယ်။ တတ်နိုင်သမျှ သစ်လွင်တဲ့ပစ္စည်းလေးတွေ၊ အရောင်စိုစိုလေးတွေကို ကြိုက်နှစ်သက်ကြ တာမို့ ကလေးအသုံးအဆောင်ကို မှောင်သောအရောင်၊မှိုင်းသောအရောင်တွေကို အထူးရှောင်သင့်ပါတယ်။ နာမည်ကို တနင်္ဂနွေအစ စနေအပိုမှည့်တာမျိုးတွေ အထူးရှောင်စေချင်ပါတယ်။
ဆရာငြိမ်းအေးလူ
ဗေဒင်သုတေသီ
၁၉.ဇူလိုင်.၂၀၂၅