ငွေကြေးနာမည်ရှင်များ သို့မဟုတ် သောင်း၊သိန်း၊သန်း၊ကုဋေနှင့်စတင်မှည့် ခေါ်ထားသော နာမည်ရှင်များ

နာမည်တွေနဲ့ ပက်သက်ပြီး လေ့လာသိရှိထားတာလေးတွေရေးမယ်လို့ စိတ်ကူးထားပြီး အကောင်အထည်မဖော်ဖြစ်တာကြာခဲ့ပြီ။ အခုတော့ နာမည်နဲ့ ပက်သက်ပြီးသိသင့်တာလေးတွေနည်းနည်းချင်း တင်ပြသွားမည်။ လူတစ်ယောက်ရဲ့ ဘဝမှာ ဘာမှမပိုင်ဆိုင်ရင်တောင်နာမည်တစ်လုံးတော့ပိုင်ဆိုင်ကြတာပါပဲ။

နာမည်ကို ကြည့်ပြီး သူ့ဘဝရဲ့ဖြတ်သန်းရမဲ့ အနေအထားအကောင်းအဆိုးတွေကို ခန့်မှန်းလို့ရသည်။ အက္ခရာတွေမှာ အစွမ်းသတ္တိတွေရှိကြတယ်ဆိုတာ လေ့လာဖူးတဲ့သူမှ ယုံမည်ထင်သည်။

နာမည်ကြားရုံနဲ့ ဟောနိုင်ပြောနိုင်တဲ့ ဆရာတွေ အများကြီးပင်။ ကိုယ့်မွေးသက္ကရာဇ် ကိုယ်တိုင်မသိဘဲဗေဒင်လာမေးကြသူတွေအများအပြားရှိနေသေးသည်။ မွေးသက္ကရာဇ်သိမှ ဗေဒင်ဟောလို့ရသည်မဟုတ်နာမည်နှင့်ပင် အကောင်းအဆိုးတွေပြောနိုင်စွမ်းရှိကြတဲ့ ပညာရှင်တွေရှိနေသေးသည်။

ဒါတွေထားတော့………

ဒီနေရာမှာပြောချင်တာက

ငွေကြေးနဲ့ပက်သက် သက်ဆိုင်တဲ့နာမည်တွေအကြောင်းပါ။ ငွေကြေးနဲ့ သက်ဆိုင်သော နာမည်ဆိုတာက

ကျွန်တော်တို့အနေနဲ့ ငွေကြေး ပိုက်ဆံတွေကိုရေတွက်တဲ့အခါမှာ တစ်ရာ တစ်ထောင် တစ်သောင်း တစ်သိန်း တစ်သန်း တစ်ကုဋေ စသည်ဖြင့်ရေတွက်ကြပါတယ်။

………………………………………..

အဲလိုငွေကြေးရေတွက်ပုံတွေကို နာမည်တွေမှာ ပြန်အသုံးပြုတာ သတိထားမိကြမယ်ထင်ပါတယ်။

ဥပမာ ” သိန်း”ထွန်း၊ “သန်း “အောင် ၊” သောင်း”နိုင် ၊ “ကုဋေ”ကြွယ် ၊

“ရာ”ကျော် ၊သိန်းသန်းဝင်း၊သောင်းသိန်းသန်း

“သန်းသန်း”အေး၊သန်းမြင့်အောင်

စတဲ့ ငွေကြေးရေတွက်ပုံတွေကို နာမည်မှာ အစားထိုးသုံးတာမျိုးပါ။

အခုပြောချင်တာကတော့ ထိုနာမည်ရှင်တွေရဲ့ အနေအထိုင်အပြုအမူနှင့် ထိုနာမည်ရှင်တွေအတွက်ထာဝရယတြာမျိုးပေးချင်တာပါ။ ယတြာပိုင်းကတော့လက်တွေ့နယ်ပယ်မှာ တော်တော်လေးအဆင်ပြေတဲ့အတွက် ကျွန်တော့်အနေနဲ့ချပြခြင်းပါ။

ထိုနာမည်ရှင်တွေနဲ့ ပက်သက်ပြီး နှစ်ပေါင်းများစွာ အချိန်ယူလေ့လာခဲ့သည်။ ထိုနာမည်ရှင်တွေရဲ့ စရိုက် လက္ခဏာ၊ ဘဝအောင်မြင်မှု

၊အိမ်ထောင်ရေးသာယာချမ်းမြေ့မှု ဘဝနေဝင်ချိန် စတဲ့အချက်တွေကိုလေ့လာကြည့်ခဲ့ပါတယ်။

ဟုတ်ပြီ သောင်းတွေ သိန်းတွေ သန်းတွေ……

ပထမဆုံးစတင်စဉ်းစားကြည့်ကြရအောင်

ငွေကြေးနဲ့သက်ဆိုင်တဲ့နာမည်တွေဖြစ်တဲ့အတွက် ကောင်းမွန်မြင့်မြတ်ခြင်းဆိုတဲ့

ဣဋ္ဌသဘောမျိုး ကျွန်တော့်အနေနဲ့ယူပါတယ်။

ဒါကြောင့် သောင်း ၊သိန်း၊ သန်းတွေနဲ့ စတင်မှည့်ခေါ်ထားတဲ့နာမည်ရှင်တွေဟာ အသားဖြူဖို့လိုပါတယ်။ အရပ်မြင့်ဖို့ အသံသြဇာရှိဖို့ ခန္ဓာကိုယ်ပြည့်ဖြိုးဖို့လိုပါတယ်။ စကားပြော ယဉ်ကျေးချိုသာဖို့ လိုပါတယ်။

ဒါမှလဲ ဣဋ္ဌသဘောဆောင်ပြီး ဆန်းဝင်ပါလိမ့်မယ်။ နာမည်နဲ့လူနဲ့ လိုက်ဖက်သွားတဲ့သဘောပေါ့။ အဲဒီလို ဆန်းဝင်သွားပြီး နာမည်နဲ့လူနဲ့လိုက်ဖက်သွားရင် ဘဝရဲ့ ကြမ်းတမ်းမှုတွေအနည်းငယ်လျော့သွားကြပါတယ်။အဘက်ဘက်က ကူညီထောက်ပံမှုတွေရတတ်တယ်။ မိမိအောင်မြင်မှုအတွက်အချိန်အကြာကြီးမကြိုးစာရပါဘူး။ ရေကန်အသင့် ကြာအသင့်ဖြစ်တတ်ပါတယ်။ ဘယ်လောက်ပဲကံအထောက်အပံ့တွေရရ မိမိမကြိုးစားရင် ဘာမှမဖြစ်လာနိုင်ပါဘူး။

ကုသိုလ်ကောင်းမှုလေးတွေသာနိစ္စပတ်လုပ်နေသူဆို အောင်မြင်ချမ်းသာပြီး နာမည်ကောင်းနဲ့ကျော်ကြားတတ်ပါတယ်။

သောင်းတွေ၊ သိန်းတွေ ၊သန်းတွေနဲ့စတင်ပေးထားပြီး အရပ်ကလဲ ပုနေမယ်။ အသားကလဲ မဲနေမယ်။ စကားပြောကလဲကြမ်းတမ်းမယ်။ အဆဲလေးပါမှပြောတတ်သူဆိုရင်တော့ ပိုဆိုးတာပေါ့။

အနိဋ္ဌ သဘောဆောင်ပြီး ငယ်ဘဝတွေခက်ခဲပင်ပန်းတတ်တယ်။ သူများအထောက်အပံ့မရဘဲ ကိုယ့်ဒူးကိုယ်ချွန်ကြိုးစားရတတ်တယ်။ သူများလုပ်လို့တစ်နှစ် ၊၂နှစ်နဲ့ အောင်မြင်တဲ့အလုပ်တစ်ခုကို မိမိလုပ်ရင် လေးငါးနှစ်လောက်မှအောင်မြင်တတ်တယ်။ ဝီရိယအားနည်းလို့မရ ၊၊ အမြဲကြိုးစားနေမှတော်ကာကြမဲ့အနေအထားပါ။

ကုသိုလ်တရားနည်းပါးသူဆိုရင် အတိတ်ကံအရ နာမည်ကျော်ကြားရင်တောင်နာမည်ဆိုးနဲ့ကျော်ကြားတတ်ပါတယ်။

ကဲ…..

အသားဖြူတာ မဲတာတွေအသာထား

အရပ်ပုတာ မြင့်တာတွေအသာထား

ဒါတွေက ပြုပြင်ဖို့မလွယ်ဘူး။ စကားအပြောအဆိုကတော့ ပြုပြင်လို့ရမယ်ထင်ပါတယ်။

သောင်း ၊ သိန်း ၊ သန်း နဲ့ စတင်မှည့်ထားတဲ့ နာမည်တွေက ဝစီဒုစရိုက်လေးပါးကို အထူးရှောင်သင့်ပါတယ်။

လိမ်ညာတဲ့စကားတွေ ….

ကုန်းတိုက်တဲ့စကားတွေ….

ဆဲရေးတဲ့စကားတွေ

အနှစ်မရှိတဲ့ စကားတွေ မပြောသင့်ပါဘူး။

နှုတ်ကနေ ဘုရားဂုဏ်တော်တွေ ၊ဂါထာတွေ မပြတ်ရွတ်နေသင့် ပါတယ်။ ပရိတ်တွေ၊ပဋ္ဌာန်းတွေ အမြဲရွတ်ဆိုပွားများသင့်ပါတယ်။

စကားပြောချိုသာယဉ်ကျေးလာပြီဆိုတာနဲ့ အောင်မြင်မှု ၊အဘက်ဘက်က အဆင်ပြေမှုတွေစတင်ပြီလို့မှတ်လိုက်ပါ။

နောက်ထပ်ဘာဆက်လုပ်ရမလဲဆိုရင်တော့ ကထိန်သင်္ကန်းကပ်တဲ့အခါ

ပဒေသာပင်လှည့်ကြတာမြင်ဖူးကြပါလိမ့်မယ်

ထင်ပါတယ်။

အဲဒီမှာ ပိုက်ဆံတွေနဲ့ကြာပန်းခိုင်တွေလုပ်ထားတာ၊ပန်းပွင့်ပုံဖော်ထားတာ မျိုးတွေ့ဖူးကြပါလိမ့်မယ်။ အဲလိုပိုက်ဆံနဲ့လုပ်တဲ့ကြာပန်းမျိုးကို လုပ်တတ်တဲ့ သူကို ရှာပြီး လုပ်ခိုင်းပါ။ ပြီးရင်မိမိအိမ်ရဲ့ ဘုရားဆောင်မှာ ပိုက်ဆံနဲ့ လုပ်ထားတဲ့ ထိုကြာပန်းကိုပန်းအိုးလေးတစ်လုံးထဲ သပ်သပ်ထည့်ပြီးပူဇော်ထားပါ။ မိမိတို့တစ်နေ့တာရတဲ့လုပ်အားခပိုက်ဆံထဲက တစ်ရာနိုင်နိုင် ၊နှစ်ရာနိုင်နိုင်

အနည်းငယ်လေးကို ထိုကြာပန်းအောက်မှာထားပြီးစုထားပါ။ နေ့စဉ် နိစ္စဓူဝစုပါ။ တစ်လပြည့်ရင် စုထားငွေကြေးလေးတွေကို မိမိဝါသနာပါရာ စိတ်ပါရာ ကုသိုလ်တစ်ခုအမြဲလုပ်ပါ ။ ကုသိုလ်ပြုပြီးရင် ပြန်စုပါ။ တစ်လပြည့်ရင်ပြန်လှူပါ။

ထိုသို့ကုသိုလ်လေးတွေ ဆက်ပေးခြင်းဖြင့်အတိတ်ကံတွေပွင့်လာပြီး ကံတွေတဖြည်းဖြည်းမြင့်မားလာပါလိမ့်မယ်ဗျ။

သတိထားကြည့်ပါ။ မိမိတို့ပတ်ဝန်းကျင်မှာ ငွေကြေးနာမည်ရှင်တွေ ရိုင်းနေရင် ၊စကားပြောကြမ်းနေရင် ၊ဝစီဒုစရိုက်တွေအမြဲလုပ်နေရင်ဘာတွေဖြစ်နေလဲ …သုံးသပ်ကြည့်ပါ။ သုတေသနလုပ်ကြည့်ပါ။

စကားပြောယဉ်ကျေးချိုသာပြီး ပရိတ်ပဋ္ဌာန်း အမြဲရွတ်ဆိုနေတဲ့ငွေကြေးနာမည်ရှင်တွေ ဘယ်လိုဖြစ်လဲ …ကံဆိုးလား ကံကောင်းလား သုံးသပ်သုတေသနလုပ်ကြည့်ပါ။

ဖြစ်နိုင်သည်…..လက်တွေ့လုပ်ရင်အဆင်ပြေနိုင်မည့်ယတြာ အစီအရင်ကိုသာပေးနေတာပါ။ ငွေကြေးနာမည်ရှင်တွေ စကားပြောချိုသာမယ် …အထက်ပါအစီအရင်တွေလဲလုပ်နေမယ်ဆိုရင် …အောင်မြင်မှုတွေဆင့်ကဲဆင့်ကဲရနေမယ်ဆိုတာ ပြောကြားရင်း ………..

ငြိမ်းအေးလူ (ဗေဒင်သုတေသီ)