ဒီဆောင်းပါးရေးဖို့ဖြစ်လာတာက မိတ်ဆွေတစ်ဦးရဲ့မေးခွန်းကြောင့်ပါ။ လိုရင်းပဲပြောကြရအောင်ဗျာ။အားတဲ့ ရက်တွေမှပဲ ကျွန်တော်က လူတွေ့မေးမြန်းခြင်းကို လက်ခံလေ့ရှိပါတယ်။တစ်နေ့ အိမ်မှာဗေဒင်ဟောနေချိန် ကျွန်တော့်မိတ်ဆွေကလဲ ကျွန်တော်အိမ်မှာရှိနေချိန်ပါ။ အားလပ်ရက်ဆိုတော့ ကျွန်တော့်ရဲ့စာအုပ်စင်ကို သူလာပြီး မွှေတာပါ။ ကျွန်တော်ကလဲ ဗေဒင်မေးတဲ့ပရိတ်သတ်တွေကို ခြံထဲမှာပဲခုံခင်းပြီးတွေ့ဆုံလေ့ရှိပါတယ်။ သစ်ရိပ်ဝါး ရိပ်နဲ့ အာဝါသကောင်းတာကြောင့် ခြံထဲမှာပဲ ဟောဖြစ်တာပါ။ ၅ယောက်ခန့်ဟောပြီးတော့ ကျန်တဲ့ appointment တွေကနေ့လည်ခင်းမှာချိန်ဆိုထားတာကြောင့် ရေခဲ သေတ္တာထဲက ကော်ဖီအေးလေးတစ်ဘူးဖောက်သောက်ပြီး ခဏနားနေမိတယ်။
မိတ်ဆွေက သူလိုချင်တဲ့စာအုပ်လေးကို လက်မှာကိုင်ထားပြီး ကျွန်တော့ ဘေးမှာလာထိုင်လေသည်။
” ငါဒီစာအုပ်တွေယူသွားမယ် သူငယ်ချင်းရေ….နောက်တစ်ပတ်မှာ လာပို့ပေးမယ်….”
“ရပါတယ္ကြာ ယူသြားပါ….”
” ဒါနဲ့စကားမစပ် မင်းကိုမေးရအုံးမယ်ကွာ…ခုနကဗေဒင်လာမေးကြသူတွေ မေးတာကြားတယ်ကွာ… အဲဒီမှာ ဇာတာတိုက်စစ်ပြီး လက်ထပ်ဖို့ မင်္ဂလာရက်လာရွေးကြတာများတယ်နော်…”
”သီတင်းကျွတ်လေကွာ ..ဒီလောက်တော့ရှိမှာပေါ့”
မိတ်ဆွေဖြစ်သူက ဧည့်သည်တွေကို ဧည့်ခံထားတဲ့ ရေနွေးကိုငှဲ့သောက်ရင်း
” ငါစဉ်းစားမိတာတစ်ခုရှိတယ်ကွ…လူတိုင်းနီးပါး မင်္ဂလာရက်ကောင်းကို ရွေးကြတာပဲလေ….ဗေဒင်ဆရာနဲ့ မနီးစပ်သူဆိုရင်တောင်မှ ပြဿ ဒါး ရက်ရာဇာလောက်တော့ ကိုယ့်ဘာသာရွေးကြတာပဲမဟုတ်လား…..ဒါပေမဲ့လက်ထပ်ပြီးတော့ ကွဲသွားကြသူတွေ စီးပွားရေးအဆင်မပြေကြတာတွေ အဘက်ဘက်ကညံ့သွားသူတွေလဲ ရှိတာပဲ မဟုတ်လား …..အဲဒါဘာကြောင့်လို့မင်းပြောမလဲ….”
မိတ်ဆွေဖြစ်သူအမေးစကားကို ပြန်ဖြေဖို့ အတန်ငယ်စဉ်းစားလိုက်ပြီး …….
” ဒီလိုကွ ငါ့ဆီမှာ မင်္ဂလာရက်ရွေးသူတွေကို ငါ့က ရက်ရွေးပေးတာအပြင် ဇာတာတိုက်စစ်တာကြောင့် အခြားဆောင်ရန်ရှောင်ရန်တွေလဲ ပြောပြတယ်ကွ…..မင်္ဂလာရက်ရွေးတယ်ဇာတာတိုက်စစ်တယ်ဆိုတာ ဥပမာ ပေးရရင် ခရီးရှည်ကြီးတစ်ခုကိုသွားဖို့ အတွက် ဇနီးမောင်နှံနှစ်ယောက်စီးသွားမဲ့ ကားကို ဝပ်ရှော့ဆရာဆီ အပ်ပြီး စစ်ဆေးခိုင်းတာနဲ့ ခပ်ဆင်ဆင်တူတယ်ကွ……
ဝပ်ရှော့ ဆရာက ကားကို မိုင်ထောင်ချီအဝေးကြီးသွားမှာဆိုတော့ သေချာစစ်ဆေးပြီး အပ်ထားတဲ့သူကို မေးတယ်ကွ…လက်ရှိဆီတွေကမသန့်ဘူး ဆီအသစ်လဲမယ် ဖစ်တာတွေလဲ ရမယ်။ ရေတိုင်ကီကလဲ ပိတ်နေတာ ရေတိုင်ကီတွေဖြုတ်ဆေးရမယ်။ မီးခိုးလိုက်နေတဲ့အတွက် စစ်ဆေးလိုက်တော့ပန့်ကျနေတယ်…ပန့်ပြင်ရမယ် ကားတာယာမှာအချို့တာယာတွေက ပန်းတွေပါး နေ တယ်…တာယာအသစ် တွေလဲရမယ်… .စသည်ဖြင့်ဝပ်ရှော့ဆရာကလိုအပ်တာတွေ ပြုပြင်ဖို့ပြောမယ်ကွာ…….
လဲမလဲပြင်မပြင်ကတော့ ကိုယ့်သဘောပဲလေ…ပြုပြင်သွားမယ်ဆိုရင်တော့ ခရီးသွားရတာအဆင်ပြေမယ် စိတ်ချမ်းသာမယ်ပေါ့ကွ…..ငါလဲအဲလိုမျိုးအကြံပေးတာပဲလေ…. ဇာတာနှစ်ခုစစ်ဆေးလိုက်ရင် မတူညီတဲ့အချက် တွေကို ပြုပြင်ဖို့ လင်မယားချင်းနားလည်မှုရှိဖို့ စတာတွေကို ပြောပြတယ်လေကွ ….လိုက်နာတာမနာတာက သူတို့အပိုင်းပဲလေ….”
”အေးပါကွာ နားလည်ပါပြီ…အခုကတော့ သဘောပေါက်သွားပါပြီ….”
”လူတစ်ယောက်ဆီမှာ ကောင်းတဲ့စရိုက်လေးတွေရှိသလိုဆိုးတဲ့စရိုက်လေးတွေရှိကြပါတယ်။ ဆိုးတဲ့စရိုက်တွေက အိမ်ထောင်ရေးကို ထိခိုက်စေနိုင်တာတွေရှိတယ်လေ”
”အေး …ဆက်ပါအုံးကွ…စိတ်တောင်ဝင်စားလာပြီ”
”ဒီလိုကွ…ငါ့တို့ ဗေဒင်ပညာမှာ အကြွင်းဖွားလေးတွေရှိတယ်။ အထူးသဖြင့် မဟာဘုတ်အကြွင်းဖွားပေါ့..။မြန်မာမွေးသက္ကရာဇ်ကိုရနဲ့စားလိုက်လို့ရလာတဲ့ အကြွင်းတွေပေါ့။ အဲဒီထဲက အိမ်ထောင်ရေးကို ထိခိုက်နိုင်တဲ့ဆိုးတဲ့ စရိုက် လေးတွေ မင်းကိုပြောပြမယ်….
၁ကြွင်း
ဒီအကြွင်းဖွားတွေမှာ အိမ်ထောင်ရေးကို ထိခိုက်စေနိုင်တာက လိမ္မာပါးနပ်မှုနည်းပါးတဲ့ စကားအပြောအဆို တွေကြောင့်ပဲ။ စကားပြောကောင်းပေမဲ့ သူတစ်ပါးကြိုက်တဲ့စကားလား …မကြိုက်တဲ့စကားလား..မခွဲခြားတတ်တာ။ အဲဒါက အိမ်ထောင်ရေးမှာရော အခြားလူမှုဆက်ဆံရေးမှာပါ အားနည်းသွားနိုင်တာပဲ…နောက်တစ်ချက်က အမှား ကိုဝန်မခံတတ်တာ….တစ်ခုခုလုပ်တာမှားတဲ့အတွက် အိမ်ထောင်ဘက်က အပြစ်တင်ရင် ဝန်မခံတာပဲ..အကြောင်း ပြချက်တွေ အမျိုးမျိုးပေးပြီး အပြစ်ကိုရှောင်လွှဲတတ်တာက အိမ်ထောင်ဘက်ကို ငြိုငြင်စေတာပဲလေ….
၂ကြွင်း
ဒီအကြွင်းဖွားတွေမှာက ကိစ္စတစ်ခုကိုလုပ်ကိုင်တော့မယ်ဆိုရင် အချိန်ဆွဲတတ်ကြတာများပါတယ်။ အိမ်ထောင်ဘက်ကကိစ္စတစ်ခုခုခိုင်းတာမျိုးဆိုရင်လဲ တော်တော်နဲ့မပြီးတတ်ကြဘူး။ အများအားဖြင့် ခပ်အေးအေး ခပ်ဖြေးဖြေးပဲ လုပ်ကိုင်ကြသူတွေများတယ်။ ဒါကြောင့်ပဲ စိတ်မြန်လက်မြန်ရှိတဲ့ အိမ်ထောင်ဘက်တွေဆို မိမိကို စိတ်မရှည်ဖြစ်ရတတ်ပါတယ်။ နောက်ပြီးဒီအကြွင်းဖွားတွေက အားနားတတ်တယ်၊သနားတတ်တယ်၊ ယုံလွယ်ကြ တယ်။ ဒါကြောင့်ပဲ ဆွေမျိုးတွေ မိတ်ဆွေတွေက အသနားခံပြီး အကူအညီတောင်းရင် ရှိတာလေးထုတ်ပေးပြီး ကူညီတတ်ကြတယ်။ ဒါကလဲ အိမ်ထောင်ဘက်ကမိမိအပေါ်စိတ်ပျက်စေတဲ့ အချက်တွေပါပဲ။
၃ကြွင်း
ဒီအကြွင်းဖွားတွေက စကားအပြောအဆိုအများကြီးလိုပါတယ်။ ငါ့စကားနွားရပြောတာ သူများကိုအပြစ် တင်လွယ်တာ…ငါသိငါတတ် ငါဆရာကြီးဆိုတဲ့ စိတ်မျိုး အပြောမျိုးရှိနေရင်အမြန်ပြင်ဆင်လိုက်ပါ။ စကားအမှား တွေကပဲ အိမ်ထောင်ရေးကို အဓိက အက်ကြောင်းထစေတာပါ။ နောက်တစ်ခုက အဘက်ဘက်ကနေ ဇီဇာကြောင်တတ်တယ်။ အစားအသောက်ကအစ ငန်တယ်ပေါ့တယ်…တူးတယ်.. စပ်တယ် စသည်ဖြင့် ဝေဖန်နေ တတ်တဲ့ သူပါပဲ။ ဒါကြောင့်ပဲ အိမ်ထောင်ဘက်က မိမိကိုစိတ်ပျက်လာစေပါတယ်။
၄ကြွင်း
ဒီအကြွင်းဖွားတွေက အိမ်ထောင်ဘက်ကိုတကယ်ရောချစ်ရဲ့လားလို့ အရင်ဆုံးမေးရမယ်….စိတ်ချမ်းသာ မယ်ထင်လို့ ပျော်မယ်ထင်လို့ သူက ငွေကြေးပြည့်စုံလို့စသည်ဖြင့်လက်တွဲလိုက်တယ်ဆိုရင်တော့ တကယ့်အရေး ဆို အိမ်ထောင်ဘက်အပေါ်အနွံတာမခံကြပါဘူး။ နောက်ပြီး ဒီအကြွင်းဖွားတွေက စိတ်အလိုလိုက်တတ်ကြပါတယ် စိတ်ချမ်းသာမှုကို ဦးစားပေးတယ်။ အိမ်ထောင်ဘက်နဲ့အတူ ဆင်းရဲလဲအတူတူ ချမ်းသာလဲ အတူတူ ဆိုတဲ့စိတ်မျိုး နည်းကြတယ်..။နောက်ပြီးကိုယ့်မိဘ ညီအကိုမောင်နှမကိုတော့ ကြည့်တယ်…အိမ်ထောင်ဘက်ရဲ့ ဆွေမျိုးတွေကို တော့အပေါ်ယံသာဆက်ဆံတတ်ကြတယ်….ဒါတွေက အိမ်ထောင်ရေးမှာ အဆင်မပြေဖြစ်ရမဲ့ အကြောင်းပါပဲ
၅ကြွင်း
ဒီအကြွင်းဖွားတွေက အိမ်ထောင်ဖက်ကို လက်ညှိုးထောင် ခေါင်းညိတ်လုပ်စေချင်တဲ့ သူပါပဲ။ မိမိစိတ် ကြိုက် မိမိလိုရာကို ပုံသွင်းချင်ကြတယ်။ မိမိစိတ်နဲ့ မိမိကိုယ် လွတ်လပ်စွာ နေလိုတဲ့အိမ်ထောင်ဘက်ကတော့ မိမိကို စိတ်ပျက်သွားတတ်ပါတယ်။ ဒီအကြွင်းဖွားတွေက မိမိအိမ်ထောင်ကျပြီးသည့်တိုင်အောင် မိဘတွေကိုပြန် လည်ထောက်ပံ့လွန်းတဲ့သူတွေပါ။ သဘောထားသေးသိမ်တဲ့ အိမ်ထောင်ဘက်မျိုးဆိုရင် ဒီကိစ္စကလဲ အိမ်ထောင် ရေးပြဿနာတစ်ခုဖြစ်သွားနိုင်ပါတယ်။ အရာရာတိုင်းမှာ စိတ်ပူပန်တတ်လွန်းတာ စိတ်လောလွန်းတာတွေက မိမိအိမ်ထောင်ဘက်အတွက် စိတ်ဆင်းရဲစရာဖြစ်နေနိုင်တယ်ဆိုတာ သိထားသင့်ပါတယ်။
၆ကြွင်း
ကတိကိုလွယ်လွယ်ပေးတတ်ကြတယ်။ ကတိပေးတာလွယ်ပေမဲ့ ကတိတည်ဖို့ကတော့ ခက်ခဲတဲ့သူတွေပါ။ စဉ်းစားကြည့်ပါ။ အိမ်ထောင်ဘက်ကို ဘာလုပ်ပေးမယ်…ဘာဝယ်ပေးမယ်ပြောပြီး တကယ်တမ်းကျတော့ ကတိ မတည်ဘူးဆိုရင်…ဘာဖြစ်မလဲ..။ နောက်တစ်ခုကအသုံးအဖြုန်းကြီးတာ…ရတာလေးနဲ့ ဘယ်လိုလောက်ငှအောင် သုံးမလဲ မစဉ်းစားဘဲ ဖြုန်းဖို့ပဲ လုပ်နေတဲ့သူဆိုရင်တော့ အိမ်ထောင်ရေးမှာ ပြဿ နာကြီးကြီးတတ်မှာပါ။ နောက်တစ်ခု စွဲလမ်းရင်ဖြတ်ရခက်ခဲတယ်ဗျ။ အရက်သောက်တတ်သူဆို အရက်စွဲမယ်…ဘယ်လိုကိစ္စတွေနဲ့မှ အရက်ပြတ်သွားဖို့ကမလွယ်ဘူး။ မကောင်းတဲ့ကိစ္စတစ်ခုခုကို စွဲလမ်းနေပြီဆိုရင်တော့ အိမ်ထောင်ဘက်က စိတ်ပျက်လာမှာ အမှန်ပဲလေ။
၀ကြွင်း
ဒီအကြွင်းဖွားတွေဟာ သူများတွေအမြင်မှာ လေးတဲ့သူတွေ ပျင်းရိတဲ့သူတွေလိုထင်နေမိတတ်ပါတယ်။ အနည်းငယ်လဲနမော်နမဲ့နိုင်ပါတယ်။တစ်ခုခုကိုအာရုံစိုက်မိပြီဆိုရင်တော့ အခြားကိစ္စတွေအားလုံးကိုမေ့သွားတတ် သူပါပဲ။ ဂိမ်းအရမ်းဆော့သူတွေ တစ်ခုခုကို ထမင်းမေ့ဟင်းမေ့ လုပ်တတ်သူတွေပါ။ဒါတွေက အိမ်ထောင်ဖက်ကို စိတ်ပျက်စေတာတော့ အမှန်ပါပဲ။ အိမ်ထောင်ဘက်က တစ်ခုခုခိုင်းထားတယ်ဆိုရင် တစ်ခုခုအပြောင်းအလဲကိစ္စ ကြုံတာနဲ့ ခိုင်းထားတဲ့ကိစ္စမေ့သွားတတ်သူပါ။ ဒါအပြင် အိမ်ထောင်ဘက်အပေါ်တွင်လဲ သဝန်တိုတတ်သူပါပဲ။ တော်ရုံမဟုတ်ဘဲ အလွန်အကျွံသဝန်တိုမိတယ်ဆိုရင်တော့ ခဏခဏပြဿ နာများရပါလိမ့်မယ်။
ဒီအချက်လေးတွေအကြမ်းဖျင်းသိရပြီဆိုရင်တော့ အိမ်ထောင်ရေးအတွက် တစ်ထောင့်တစ်နေရာအကျိုးပြုနိုင်မယ် မဟုတ်လား…..”
”အခုလို သိရတော့လဲ အိမ်ထောင်ပြုမဲ့လူတွေအတွက် ဆင်ခြင်လို့ရတာပေါ့…”
“ကဲနေလဲမြင့်နေပြီ …မင်းလဲသွားတော့ …ငါလဲ ခဏနားအုံးမယ်…..”
“ok သူငယ်ချင်းနောက်တစ်ပတ်မှ ပြန်ဆုံမယ်….”
မိတ်ဆွေကနေပူတာကြောင့် စာအုပ်လေးကို ခေါင်းပေါ်တင်ပြီး အိမ်ပြန်သွားလေပြီ….
မိုးအကုန် ဆောင်းအကူးကာလဆိုပေမဲ့နေမင်းက ပူပြင်းလွန်းတယ်…. ဒီအပူထက် အိမ်ထောင်ရေးအပူက ပိုပြင်းသည်မဟုတ်လား…..မိမိတတ်ကျွမ်းတဲ့ ဝေဒပညာဖြင့် အိမ်ထောင်ရေးအပူကို ထီးတစ်လက်အဖြစ် အနည်းငယ် အပူသက်သာစေမယ်ဆိုရင်ဖြင့်………။
၇ရက်သားသမီး အပေါင်း ကောင်းကျိုးလိုအင်ဆန္ဒတွေ ပြည့်ဝကြပါစေ။
ဆရာငြိမ်းအေးလူ ( ဗေဒင်သုတေသီ )
viber only -09775555695
